Neh 1 | ZomZIV | STEP | Hecaliah’ tapa Nehemiah thugente: A kum sawmnihna kum Kislev kha sung kumpi khua Susa a ka om laitakin

Nehemiah 1

Nehemiah Thungetna

1 Hecaliah’ tapa Nehemiah thugente:

A kum sawmnihna kum Kislev kha sung kumpi khua Susa a ka om laitakin 2 ka sanggamte khat Hanani, midang pawlkhat tawh Judah gam panin hong tung uh a, amaute kiangah sal pana suakta Jew mi a baanglaite thu le Jerusalem thu zong ka dong hi. ^a

3 Amaute in, “Tua kuala a om suakte le sal suakta a om laite lungkham mahmah uh a, a kisimmawh mahmah hi. Jerusalem kulh kicimin a kongpite mei in kangtum hi,” hong ci uh hi. ^b

4 Hihte ka zak ciangin tusukin ka kap hi. Ni bangzah hiam khat vantung Pasian mai-ah an tangin thu ka ngen hi. 5 Tua ciangin: ^c

“TOPA vantung Pasian, nang hong itin na thupiakte a mangte tunga a itna thukhunte a zui a lian mahmah a kihtakhuai Pasian aw, 6 na nasem Israel mite adingin na nasempa in nangma mai-ah sun le zana kong thungetna a za dingin na bil hong ngat inla na mit hong hak in. Keimahmah le ka pa innkuanpihte a kipan ko Israel mite in nang tunga kong bawlsa uh mawhnate kong pulaak hi. 7 Kote in nang tungah gitlohna ka hih khin uh hi. Na nasempa Moses tungah na piaksa thupiaknate, thukipte le thukhamte ka mang kei uh hi. ^d
8 “Na nasempa Moses tungah, ‘Note na muanhuai kei uh leh minamte lakah kong thehthang dinga, 9 ahi hangin kei lamah hong kihei-in ka thupiak na man uh leh tua ciangin a gamla penah sal-a omte nangawn tua lai panin kong khawm dinga, ka Min a ten nadingin ka teelsa munah kong puak ding hi,’ ci-a na lamlahna phawk in. ^e
10 “Amaute, na hat mahmah na le a thahat na khutin na tatsa na nasemte, na mite ahi uh hi. 11 Topa aw, hih na nasempa le na min zahtakna nuam a sa na nasemte thungetna na bil hong ngat in. Tuni-in na nasempa hong gualzosak inla, hih mipa muhna ah hong angvan in,” ka ci hi. ^f

Keimah kumpipa hai-tawipa ka hi hi.